गिरगावात जाणं आता कमी झालंय. पूर्वी तीन वर्षं ऑफिस गिरगावात होतं, नंतर चार वर्षं लॅमिंग्टन रोडवर म्हणजे गिरगावच्या मागेच. पुढे २४वर्षं बोरीबंदरला तर अडीच वर्षं काळबादेवीत ऑफिस होतं. म्हणजे जवळपास ३५ वर्षं गिरगांवच्या परिसरात. त्यामुळे तिथल्या शाकाहारी व मांसाहारी रेस्टॉरंटची चव जणू पाठ झाली होती. राजा राममोहन रॉय रस्त्यावरचं व्हॉइस ऑफ इंडिया, पुढे श्रीराम बोर्डिंग, मॉडर्न लंच होम, ठाकुरद्वार नाक्यावरलं सत्कार, चिरा बाजारातलं चर्च रेस्टॉरंट, खत्तर आळीतलं मराठी खानावळ, अग्यारी लेनची मराठा खानावळ आणि नंतर सु्रू झालेली मालवणी स्वाद, सायबिणी गोमांतक अशी किती तरी. यात शाकाहारीचा उल्लेख केला तर आणखी ४० रेस्टॉरंटची नावं तरी लिहावी लागतील. तरीही अद्याप सु्रू असलेल्या चाफेकर, पणशीकर, कोल्हापुरी चिवडा, विनय, मनोहर, मेवाड, प्रकाश दुग्ध मंदिर, तांबे, न्यू आनंद भुवन, सेंट्रल लंच होम, राजा, बंद झालेले वीरकर, कोना, मॉडर्न आणि मांसाहारी अनंताश्रम, लीलाधर ही यादीही मोठी होईल.
गिरगाव चर्चच्या रांगेत पुढे असलेलं श्रीराम खूप जुनं आणि मासे खाणाऱ्याचं अत्यंत प्रिय व आवडतं ठिकाण. सर्व प्रकारचे मासे, त्यांचं कालवण वा तव्यावर तळलेले त्यांचे तुकडे तिथं मिळतात. जणू गोपी टॅंकचा मासळी बाजारच. कोळंबी, पापलेट,बांगडा, तिसऱ्या, रावस, जिताडा, जवळा, मोरी, माकूळ, सुरमई, हलवा, खेकडे अगदी सर्व. सर्वांचं कालवण एका प्रकारचं नसतं. त्यामुळे माशानुसार चव बदलते. मासे न खाणाऱ्यांसाठी चिकन आणि मटण यांचे असंख्य प्रकार यांच्या मेन्यूमध्ये आहेत. इथं जेवायला मांसाहारी लोकच येतात, पण त्यांच्यासोबत येणाऱ्या शाकाहारीसाठीही बरेच प्रकार आहेत.
गिरगावात थाळी हा प्रकार लोकप्रिय. नव्या मांसाहारी रेस्टॉरंटपेक्षा श्रीराम बरंच स्वस्त आहे. चर्चच्या आधी नाक्यावर व्हॉइस ऑफ इंडिया हे मस्त आणि स्वस्त रेस्टॉरंट. अनेक मित्रांच्या सुलेमानी चहा पीत मैफली रंगण्याचं हे ठिकाण. इथलं मटण व चिकन अप्रतिम. फक्त तेल कमी असं सांगावं लागतं. अन्यथा मटण वा चिकन मसालामध्ये वर तवंग दिसू लागतो. ऑम्लेट पाव खाण्यासाठी येणाऱ्यांची संख्याही मोठी. काही जण इथं येऊन चमच्याने नुसती अंडा भुर्जीच खातात. त्याच्या शेजारीच शाकाहारी मंडळींसाठी मनोहर आहे. तिथली पाव भाजी खूप प्रसिद्ध. पाव भाजीसाठी ते जो चटणीसारखा मसाला तयार करतात, तो तर अप्रतिम. त्याच्या पलीकडे मेवाड हॉटेल. तिथं दुपार झाली की गरमागरम मिसळ आणि ताजे पाव खाण्यासाठी तिथं गर्दी असते. खिशात कमी पैसे असले की तेच आसरा. त्याच्यासमोर पारशाचं कॅफे डे ला पेक्स. ते खूपच शांत.
चर्चच्या समोर मॉडर्न लंच होम. छोटंसं, पण जेवण उत्तम आणि दरही बऱ्यापैकी वाजवी. अनेक जण इथं सुरमई थाळी वा बोंबील थाळी मागवतात. काही जण फक्त मांदेली थाळीचे शौकीन. इथंही श्रीराम बोर्डिंगप्रमाणे समुद्रात सापडणारे सर्व जीव मिळतात. मटण थाळी, चिकन थाळीही आहे. थाळी घेणं परवडतं. तीन चार जण गेले तर माशांचे दोन प्रकार, एखादा चिकन वा आवडीनुसार मटणाचा प्रकार असले तर जिभेचे चोचले एकदम पूर्ण होतात. नीर डोसा व चिकन खूप मस्त. पंजाबी व चायनीज प्रकारही मिळतात. गिरगाव नाक्यावरली ही ठिकाणं विसरून चालतच नाही. चर्चकडून जगन्नाथ शंकर शेट मार्गावर काळबादेवीच्या दिशेला चालू लागलात की एक किलोमीटरवर नाथ माधव पथावर खत्तर गल्लीपाशी आहे मराठी खानावळ. इथलं जेवणही उत्तम. इथली जवळा भाजी, जवळा फ्राय, खेकडा मसाला, बांगडा, पापलेट, सुरमई असलेली त्यांच्या भाषेत ‘मच्छी कढी‘ खास. इथली चिकन वा मटणची बिर्याणी ही लखनवी किंवा हैदराबादी बिर्याणीपेक्षा पूर्ण वेगळी, तिखट. इथलं मटण, चिकन व वडे खूपच छान.
शाकाहारी हवं असेल तर जगन्नाथ शंकर शेट रोडवर आसपास पणशीकर आणि कोल्हापुरी चिवडा आहे आणि ठाकुरद्वारात वैद्य वाडीत बी. तांबे यांचं सुजाता आहे. ठाकुरद्वारातच विनय हेल्थ होम. प्रचंड मेन्यू आहे तिथं. या चारही ठिकाणी मिळणारे वडा, पियुष, मिसळ साबुदाणा वडा हे चार पदार्थ मन तृप्त करतात. ठाकुरद्वारात, म्हणजे बॅ. बाबासाहेब जयकर मार्गावर शिरलात की लगेच डाव्या बाजूला आहे सत्कार रेस्टॉरंट. तेही अर्थातच मांसाहारी. मत्स्यप्रेमी मंडळींचं विशेष आवडतं. सत्कार नावाचं माशांसाठी प्रसिद्ध रेस्टॉरंट गोरेगाव पूर्वेला स्टेशनसमोर आहे. विलेपार्ले पूर्व, डोंबिवली पूर्व आणि अगदी ठाण्यातही सत्कार नावाची मांसाहारी रेस्टॉरंट्स आहेत. काही शाकाहारी सत्कारही आहेत. तर ठाकूरद्वारच्या सत्कारमध्ये चिकन व मटणाचे असंख्य प्रकार आहेत. अशा ठिकाणी मासे वा मटण, चिकन थाळी घेणंच परवडतं. शाकाहारी मंडळींसाठी काळ्या वाटाण्याची उसळ व अन्य अनेक प्रकारही आहेतच. पुढे काळबादेवीच्या दिशेने जाताना दादीशेठ अग्यारी लेनच्या परिसरात मराठा हॉटेल आहे. ते मांसाहारी जेवणासाठी प्रसिद्ध. कोळंबीची खिचडी, बोंबलाची भजी, वजडी यासह सर्व प्रकारचे मासे आणि चिकन व मटणाचे खूप प्रकार या मराठा हॉटेलमध्ये मिळतात. जवळच्या मांसाहारी रेस्टॉरंटपेक्षा इथले दर आणखी कमी आहेत आणि चव छान. इथंही वेगवेगळ्या माशांची थाळी तसंच मटण, चिकन व अंड्याची करी वा ऑम्लेट असलेली थाळी घेतली तर खूप स्वस्त पडतं. थाळी घेतली तर सुमारे अडीचशे/तीनशे रुपयांत दोघांचं जेवण होतं.
त्याच परिसरात आहे सेंट फ्रांसिस झेविअर स्ट्रीट. त्या स्ट्रीटच्या तोंडावरच चर्च रेस्टॉरंट आहे. तिथं जवळच सेंट झेविअर चर्च असल्यानं रेस्टॉरंटच्या नावातही चर्च आलं आहे. बरंच जुनं रेस्टॉरंट. बाहेरून ते इराण्याचं असावं असं वाटतं. हेही सामान्यांना परवडणारं ठिकाणं. इथं जेवणात मासे आहेत.पण मटण, खिमा, मटण करी,सुकं मटण,चिकन व अंड्याचे अनेक प्रकार मिळतात. इथंही जेवण स्वस्तात होतं. लॅमिंग्टन म्हणजे भडकमकर मार्गावर असाल तर मांसाहारीसाठी अमृत पंजाब आणि शबनम रेस्टॉरंटला तर शाकाहारीसाठी घसीटाराम हलवाईला नक्की भेट द्यावी.
गिरगाव परिसरात मासे, मटण, चिकन थाळी व पदार्थ देणारी बरीच रेस्टॉरंट होती. आता गिरगावातली मराठी लोकसंख्या कमी होत आहेत. शाकाहारी व जैन खाद्यपदार्थांचा प्रभाव वाढतोय. मरिन लाईन्स परिसरात गोवन ख्रिश्चनांची अनेक रेस्टॉरंट होती. तिथं विंदालू, सोर्पोतेल असे पोर्तुगीज गोवन पदार्थ मिळत. त्यातील काही शिल्लक आहेत. त्यांच्याविषयी पुन्हा कधी तरी.
#mumbai #girgaonkar
