लग्नात त्याने प्रथमच तिचा हात हाती घेतला आणि मग त्याला आलेला अनुभव आणि त्याचा हातांचा पहिल्यांदा होणार स्पर्श ह्या अश्या सुंदर क्षणाला कवितेत गुंफण्याचा प्रयत्न केलाय !!
चुंबने कोवळ्या तळहातांची
आलिंगने लाजऱ्या बोटांची
हात तुझा सखे घेऊन हाती
भर्जरी स्पर्शाची जणू अनुभूती
झंकारती हळवी स्पंदने
तळव्यांच्या मधुमिलने
बरसती शहाऱ्यांच्या सरी
आषाढातील धुंद घनापरी
हात तुझा सखे घेऊन हाती !!!
लवचीक मनगटांवरी रुंजी
कुजबुजल्या कापऱ्या कांकणांची
अधीर निश:ब्दाची गुंजती
स्वरझंकृत नवथर गाणी
हात तुझा सखे घेऊन हाती !!!
मधु दवात तृप्ततेच्या
हस्त रेषाच विरघळल्या
दव भिजल्या तळव्यांवरी
रेशीम आठवणी लालकेशरी
हात तुझा सखे घेऊन हाती
भर्जरी स्पर्शाची जणू अनुभूती
जिवणीतुनि निथळती
विस्मयीत लाजरे मोती
गंधीत उसास्यांनी न्हाहली
ओठांवरली तीळ चांदणी
हात तुझा सखे घेऊन हाती
भर्जरी स्पर्शाची जणू अनुभूती !!!!